Jarðhitinn sparaði 67 milljarða króna í fyrra

Nýting jarðvarma til húshitunar sparar íslenska þjóðarbúinu 50 til 80 milljarða króna á ári, sem annars færu til olíukaupa. Þetta kemur fram í nýrri skýrslu Orkustofnunar.

Skýrslan, sem er eftir þau Ingimar Haraldsson, Þóru Þórisdóttur og Jónas Ketilsson, staðfestir það sem menn hafa löngum vitað; að jarðhitinn er einhver mesta auðlind Íslendinga. Niðurstaðan er í stórum dráttum sú að ef jarðhitans nyti ekki við og híbýli væru kynnt með olíu þyrfti þjóðin að leggja til 50-80 milljarða kr. aukalega á ári til að standa undir innflutningi á olíu til húshitunar.

Uppsafnaður núvirtur sparnaður frá árinu 1970 er talinn nema 1.330 milljörðum króna. Á síðasta ári er sparnaður Íslendinga talinn hafa numið 67 milljörðum króna, en það jafngildir um 210 þúsund krónum á hvern íbúa landsins.

Skýrsluhöfundar segja jafnframt að notkun jarðhitans auki orkuöryggi og verji þjóðina fyrir utanaðkomandi sveiflum á alþjóðlegum olíumörkuðum og gengi gjaldmiðla. Þá sé ótalinn efnahagslegur ávinningur vegna annarra nota jarðhitans, svo sem til raforkuvinnslu, iðnaðar, fiskeldis og ylræktar.

Þá nefna þeir að mörg jarðhitasvæði eru aðdráttarafl fyrir ferðamenn sem sækjast í að upplifa gjósandi vatnshveri og gufuhveri og böð í jarðhitavatni, sem afli þannig tekna fyrir þjóðarbúið. Jarðhitinn hafi einnig jákvæð samfélagsleg og umhverfisleg áhrif.