Rammaáætlun þarf afbrigði

Beita þarf afbrigðum eigi að taka frumvarp um rammaáætlun um verndun og nýtingu á dagskrá Alþingis á yfirstandandi þingi. Í gær var útbýtingardagur, en þá þarf að leggja fram þau frumvörp sem lögð verða fyrir þingið.

Frumvarpið hefur verið í þingflokki Vinstri grænna frá því í desember og hefur verið nokkuð umdeilt. Heimildir Fréttablaðsins herma að umþóttunartíminn hafi farið fyrir brjóstið á Samfylkingarfólki, sem vilji ljúka málinu. Nokkuð hafi kastast í kekki á milli stjórnarflokkanna, en á síðustu dögum hafi samvinnan orðið mun meiri. Samstaða sé að nást um meginlínur og vinnan gangi vel.

Mikillar tortryggni hefur gætt í hópi náttúruverndarsinna gagnvart hugmyndunum. Það er ekki síst sú staðreynd að meta eigi náttúruperlur eins og Geysi og Gullfoss. Þeir treysta því illa að það sé einungis gert til að fá viðmið fyrir önnur svæði, líkt og fullyrt er. Raunar má segja að sú tortryggni sem ríkt hefur undanfarin ár í þessum málaflokki endurspeglist í vinnunni.

Katrín Júlíusdóttir iðnaðarráðherra segist bjartsýn á að vinnunni ljúki á næstunni. Kynningarferli á áætluninni á að ljúka 19. apríl, en sá frestur verður líklega framlengdur um tvær vikur. Stefnt er að því að frumvarpið hljóti afgreiðslu fyrir þann tíma.- kóp