Norsk loðnuskip streyma á Íslandsmið

Norsk loðnuskip streyma nú á loðnumiðin austur af landinu, en þau mega veiða rösklega 28 þúsund tonn af loðnukvótanum, sem gefinn var út nýverið.

Frá því síðdegis í gær og fram á nótt, komu tuttugu norsk skip inn í íslensku lögsöguna fyrir austan land, en þau mega ekki vera fleiri í einu á miðunum. Fleiri hafa þó veiðiheimildir, þannig hvert skip fer varla nema eina veiðiferð á Íslandsmið, miðað við að hvert skip beri rúmlega þúsund tonn. Þau eru ekki enn farin að tilkynna Landhelgisgæslunni um afla.

Íslensku loðnuskipin fara hinsvegar hægar í sakirnar og bíða þess að hrognin í loðnunni þroskist og þyngist, en mjög gott verð fæst nú fyrir loðnuhrogn, einkum í Asíu.