Ökufantur dæmdur fyrir að aka á tæplega 200 km hraða

Maður á þrítugsaldri var í morgun dæmdur í Héraðsdómi Suðurlands fyrir að hafa ekið bifhjóli á 186 kílómetra hraða í september á síðasta ári.

Samkvæmt lögreglu var lögreglumaður við umferðareftirlit á afleggjaranum að Hnausi í Flóahreppi og fylgdist með umferð á Suðurlandsvegi. Veitti hann athygli tveimur bifhjólum sem var ekið vestur Suðurlandsveginn.

Fremra bifhjólinu var ekið talsvert hraðar og mældist það samkvæmt ratsjá lögreglubifreiðarinnar á 192 km hraða en ratsjáin var læst í 189 km. Fór lögreglan tafarlaust af stað og veitti því athygli, þegar bifhjólin óku framhjá henni, að fremra hjólið var hvítt en seinna hjólið skærgult.

Var hjólunum veitt tafarlaus eftirför og kveikt á forgangsljósum lögreglubifreiðarinnar.

Skammt austan við Þingborg hefði lögreglan farið fram úr síðara hjólinu og gefið ökumanni fremra hjólsinsmerki um að stansa, sem hann gerði. Neitaði ökumaður fremra hjólsins alfarið að hafa ekið á mældum hraða, en kvaðst hafa verið á um 100 km hraða.

Héraðsdómi þótti sannað að meðalhraði hjólsins hefði verið 186 kílómetra hraði á klukkustund og var hann því sviptur ökuréttindum í átta mánuði auk þess sem hann skal greiða 200 þúsund króna sekt fyrir brotið.