F-listinn skilar ekki ársuppgjöri vegna Ólafs F

Frjálslyndi flokkurinn segist ekki geta skilað ársreikningi til Ríkisendurskoðunar meðal annars af því að dráttur hefur orðið á greiðslu á styrk til Frjálslynda flokksins sem Reykjavíkurborg greiðir til starfsemi flokkanna í borginni en styr hefur staðið um þann styrk á milli flokksins og Ólafs F. Magnússonar, fyrrum borgarfulltrúar F-listans.

Þetta kemur fram í tilkynningu frá Frjálslynda flokknum sem segist ennfremur hafa gert Ríkisendurskoðun grein fyrir stöðu mála. Þá segir einnig:

„Meðan að sú óvissa er fyrir hendi, hvort eða hvenær flokknum berist styrkurinn er augljóst að ekki er hægt að gera grein fyrir þeim fjármunum í bókhaldi þó lög mæli svo fyrir. Ábyrgðin hlýtur alfarið að liggja hjá borgarstjóra fyrir hönd borgarinnar vegna þess."

Svo er bent á að flokkurinn hafi gert bókhald sitt opinbert og má nálgast það á vefsíðu flokksins xf.is.

Svo segir í lok tilkynningar frá flokknum:

„Flokkurinn mun gera bókhald sitt fyrir árið 2008 opinbert um leið og borgarstjóri fyrir hönd borgarinnar hefur skilað þeim peningum sem borginni ber að greiða skv. lögum um stjórnmálaflokka og fjórflokkurinn í borginni hefur þegar greitt sjálfum sér."

Greiðslan sem um ræðir getur verið allt að þrjár milljónir en flokkurinn hefur áður greint frá því að hann íhugi að kæra Ólaf fyrir fjárdrátt vegna málsins.