Skólaráð mun láta í sér heyra

„Skólaráði Seljaskóla finnst að því komi sá niðurskurður við, sem skólinn verður fyrir, og boðar að það muni láta í sér heyra.“ Þetta segir Þórður Kristjánsson, skólastjóri Seljaskóla, spurður um nýlega ályktun skólaráðs skólans.

„Skólaráð Seljaskóla mun ekki sitja aðgerðarlaust hjá, komi til frekari niðurskurðar á starfsemi skólans,“ segir í ályktuninni, „og óskar eftir því að fyrirætlanir fræðsluyfirvalda varðandi skólamál verði kynntar foreldrum í hverfinu áður en til framkvæmda kemur.“

Þórður segir að þarna eigi skólaráðið við að það muni halda áfram að ræða við fræðsluyfirvöld. Hins vegar sé ekki verið að boða neinar mótmælagerðir.

Í ályktun skólaráðsins segir enn fremur að það ástand sem skólinn búi við geti gengið í takmarkaðan tíma, en ekki til lengdar. Nauðsynleg endurnýjun á tækjabúnaði þurfi að vera til staðar, endurmenntun starfsfólks megi ekki staðna og námsferðir nemenda megi ekki stöðvast. Skerðing á forfallastundum sé óviðunandi og skert gæsla í frímínútum geti ógnað öryggi barnanna.

Varar skólaráðið eindregið við frekari niðurskurði í grunnskólum borgarinnar.- jss