Náttfari gripinn á Selfossi

Lögreglan á Selfossi greip í nótt svonefndan náttfara, sem hún hefur verið á höttunum eftir í rúma tvo mánuði, fyrir fjöldann allan af afbrotum.

Lögreglu fór að gruna piltinn, sem er aðeins 17 ára, vegna fyrri tilburða hans hans í þá veru að stela úr mannlausum bílum, og fóru að fylgjast með honum. Í nótt fór hann enn á kreik og fór að kanna hvort bílar væru ólæstir, uns hann fór inn í einn slíkan og fór að róta þar í hirslum. Þar stóð lögregla hann að verki, og handtók hann. Við yfirheyrslur í morgun játaði hann á sig fjölmörg afbrot, einkum þjófnað úr bílum, og fannst þýfi við húsleit heima hjá honum í morgun.

Hann hefur reynst lögreglunni óvenju sleipur, því henni hafa borist fjölmargar ábendingar um grunsamlegar mannaferðir undanfarnar vikur og mánuði, en hann hefur ætið verið horfinn, þegar lögregla lét til skarar skríða, og ekki fundist þótt talsverð leit hafi nokkrum sinnum verið gerð að honum, eða þartil í nótt, að hann gekk í gildru lögreglunnar.-