Ráðherra þrengir að útgerðinni með nýju frumvarpi

Nýtt frumvarp Jóns Bjarnasonar sjávarútvegs- og landbúnaðarráðherra sem nú er til umræðu á Alþingi þrengir töluvert að útgerð landsins hvað varðar allar hreyfingar með kvóta. Þannig er hlutfall óveidds kvóta sem útgerð er leyfilegt að flytja milli fiskveiðiára skorið niður úr 33% og í 15%. Þeir sem ekki veiða 50% eða meir af kvóta sínum á fiskveiðaárinu verða sviptir kvótanum.

Í greinargerð með frumvarpinu segir að fyrir utan fyrrgreind ákvæði varði heimilað verði að stunda veiðar í atvinnuskyni á sama tímabili og frístundaveiðar eru stundaðar. Þetta þýðir að þeir sem eiga kvóta fyrir munu geta stundað svokallaðar strandveiðar án þess að kvóti þeirra skerðist.

Þá er að finna í frumvarpinu bráðabirgðaákvæði er lýtur að veiðistjórnun á skötusel og gjaldtöku fyrir úthlutun skötuselskvóta. Þetta fyrirkomulag á skötuselsveiðum hefur töluvert verið til umræðu innan sjávarútvegsins. Samkvæmt frumvarpinu ætlar ráðherra að setja fast verð á 2.000 tonn á skötusel og úthluta þeim kvóta sjálfur. Verðið er sett á 120 kr. á kílóið. Gæti ríkissjóður því aflað 240 milljón kr. með þessari kvótasölu.

Af öðrum breytingum má nefna að línuívilnun verður aukin, heimild er veitt til að kveða á um vinnsluskyldu á uppsjávarfiski og heimildir til flutnings kvóta frá skipi takmarkaðar.