Landsmótið verður í Reykjavík

„Ég vona að þetta verði til góðs fyrir hestamennskuna í landinu,“ segir Haraldur Þórarinsson, formaður Landssambands hestamannafélaga.

Hestamannafélagið Fákur og landssambandið undirrituðu í gær samstarfssamning um að Landsmót hestamanna árið 2012 yrði haldið á félagssvæði Hestamannafélagsins Fáks í Reykjavík.

Landsmót eru haldin á tveggja ára fresti og verður landsmót haldið í Reykjavík dagana 24. júní til 1. júlí 2012 á 90 ára afmæli Hestamannafélagsins Fáks. Landsmót draga að sér mikinn fjölda innlendra sem erlendra gesta og á síðasta Landsmóti voru um 14 þúsund gestir og 1.100 hross skráð til leiks svo það má búast við mikilli hátíð, því íslenski hesturinn skipar stóran sess í hjörtum margra. Ætla má að tíundi hver Íslendingur stundi hestamennsku með reglubundnum hætti og fimmti hver erlendur ferðamaður sem kemur til landsins fer á hestbak, að því er fram kemur hjá Landssambandi hestamannafélaga.

Hestamannafélagið Fákur og Landsmót ehf. munu hefja undirbúning að mótinu á vordögum og stefna á að halda glæsilegt Landsmót fyrir hestamenn og gesti.- jss