Breytingar verði gerðar af virðingu

„Það er mikilvægt, ef af verður, að breytingarnar verði framkvæmdar af virðingu við þetta merka hús,“ segir Júlíus Vífill Ingvarsson, formaður skipulagsráðs Reykjavíkur, um ósk eiganda Heilsuverndarstöðvar­innar á Barónsstíg að innrétta húsið sem hótel.

Júlíus bendir á að um sé að ræða atvinnuhúsnæði í einkaeigu. „Þeir sem vilja reka hótel í atvinnuhúsnæði hafa rétt til þess og geta byggt umsókn um slíkt á þeim forsendum. Það er hálf sorglegt að svona flott hús sem er ákveðið kennileiti hér í Reykjavík skuli ekki vera í notkun,“ segir hann.

Eins og fram kom í Fréttablaðinu í gær kveðst eigandi hússins, Álftavatn ehf., árangurslaust hafa reynt að koma því í notkun sem læknamiðstöð og sjúkrahótel. „Auðvitað hefði maður helst viljað sjá þetta hús í þeirri notkun sem það var byggt fyrir – í þágu heilbrigðisgæslu,“ segir Júlíus.

Skipulagsráð hefur ekki tekið afstöðu til málsins. Álftvatn ehf. leggur áherslu á að vinnslu málsins sé hraðað svo að Icelandair Hotels geti hafið þar rekstur strax í vor en Júlíus segir margt ógert. Við blasi að gera þurfi miklar breytingar á innviðum hússins. „Ég reikna með að húsafriðunarnefnd og fleiri fagaðailar hafi áhuga á að fylgjast vel með þessu máli. Þá verður að hafa í huga hvaða áhrif breytt notkun geti haft á nærumhverfið,“ segir formaður skipulagsráðs. - gar