Höfuðpaurarnir í mansalsmálinu ganga lausir

Upplýsingar og gögn sem lögreglan á Suðurnesjum aflaði sér við rannsókn mansalsmálsins svokallaða gætu nýst til að hafa hendur í hári þeirra sem skipulögðu mansalið og sendur fórnarlambið til Íslands en þeir ganga enn lausir.

Eins og kunnugt er voru fimm Litháar dæmdir í gær fyrir mansal. Þeir fengu fimm ár hver. En þeir voru bara dæmdir fyrir að taka við stúlkunni, flytja hana og hýsa, hér á landi, í því skyni að notfæra sér hana kynferðislega.

Þeir voru ekki dæmdir fyrir þann þátt málsins sem átti sér stað í Litháen, þar sem stúlkan var gerð út í vændi gegn eigin vilja og barinn til hlýðni þegar hún mótmælti. Allt lítur út fyrir að það séu aðrir menn, búsettir í Litháen sem beri ábyrgð á því.

Einn Lithái, Tómas að nafni, er sérstaklega grunaður um að hafa átt stóran þátt í því að koma fórnarlambinu hingað til lands. Hann er sá sem fórnarlambið segir að hafi komið að máli við sig í Litháen og boðið henni vinnu hér á landi, hann hafði frumkvæðið að því að lita á stúlkunni hárið og senda hana hingað á fölsuðu vegabréfi.

Tómas og mögulegir samverkamenn hans í Litháen er ekki endilega lausir allra mála þó mansalsmálinu hafi lokið með dómi hér á landi. Öll gögn sem lögreglumenn á Suðurnesjum hafa aflað sér í tengslum við málið verða þýdd og send til lögreglunnar í Litháen, og til Europol og Interpol með aðstoð alþjóðdeildar ríkislögreglustjóra.

Þau verða í framhaldi skoðuðu af lögreglunni í Litháen og þá kemur í ljós hvort rannsókn geti hafist þar, með það að markmiði að hafa hendur í hári þeirra manna sem sendu stúlkuna hingað til lands.