Alls bjóða nú 96 aðilar upp á gistingu í 4.898 rúmum á höfuðborgarsvæðinu, að því er kemur fram í gögnum frá Ferðamálaráði sem lögð voru fram á síðasta fundi skipulagsfulltrúans í Reykjavík.
Eins og við er að búast eru flest gistirúmin í 101 Reykjavík eða 2.060 talsins. Í póstnúmerinu 105 eru næstflest rúm, 1.342.
Að því er segir í greinargerð sem lögð var fyrir skipulagsfulltrúa er búist við fjölgun ferðamanna til landsins.
„Með tilkomu tónlistar- og ráðstefnuhússins eru bundnar vonir við aukningu ráðstefnugesta til landsins og með auknum samgöngum til landsins og fleiri áfangastöðum hjá flugfélögunum geta ferðaþjónustuaðilar ekki verið annað en bjartsýnir á framhaldið,“ segir í greinargerðinni.
Eðlilega er gistiþörfin mest mánuðina júní, júlí og ágúst og miðborgin hefur mesta aðdráttar-aflið. „Með auknu gistirými í miðborginni mun að líkindum halla á gististaði utan miðborgarinnar,“ er spáð í greinargerðinni. Fram hefur komið að ýmis áform um fjölgun gistirýma eru uppi, meðal annars rekstur hótels í gömlu Heilsuverndarstöðinni á Barónsstíg, eins og Fréttablaðið hefur skýrt frá.
Mesta nýting gistirýma á höfuðborgarsvæðinu á einum stökum mánuði er rúmlega 80 prósent. Nýtingin sveiflaðist á milli þess að vera 81 prósent í júlí niður í 35 prósent í desember á árinu 2008 samkvæmt tölum Hagstofunnar.
Oftast er því hægt að fá gistingu eftir eigin höfði en á vissum álagstímum, til dæmis vikurnar í kring um menningarnótt og Gay Pride-hátíðina, fá ekki allir þá gistingu sem þeir helst kjósa. „Gestir urðu að sætta sig við gistiheimili og hótel utan miðborgarinnar, til dæmis í Kópavogi og Mosfellsbæ,“ segir í greinargerðinni.
gar@frettabladid.is
