Dagur: Ráðhúsið orðið eitt helsta vígi frjálshyggjunnar

Ráðhús Reykjavíkur er orðið eitt helsta vígi frjálshyggjunnar eftir hrun, að mati Dags B. Eggertsson oddvita Samfylkingarinnar í borgarstjórn. Hann segir að í þriggja ára áætlun Reykjavíkurborgar sé gert ráð fyrir að 11% atvinnuleysi haldist óbreytt til 2013 og að athygli veki að borgastjóri boði engin viðbrögð heldur einungis 70% niðurskurði í framkvæmdum borgarinnar næstu þrjú árin.

„Gagnrýni á þetta kallaði borgarstjóri "vantrú" á atvinnulífinu. Það er í hæsta móta óviðeigandi í sömu andrá og borgarstjóri spáir metatvinnuleysi næstu þrjú ár," segir Dagur í tilkynningu.

Þar segir að Samfylkingin hafi gagnrýnt áherslur meirihlutans og „áhugaleysi" hans um atvinnumál og gerði breytingartillögu við þriggja ára áætlun. Þar er gert ráð fyrir að í stað 70% niðurskurðar í framkvæmdum og viðhaldi verði lagðir 5,3 milljarðar króna á ári til þeirra verkefna. Það felur í sér 8,8 milljarða aukið framkvæmdafé á næstu þremur árum, að mati borgarfulltrúa Samfylkingarinnar. Þeir telja að borgin hafi alla burði fjárhagslega til að standa undir þessu framkvæmdastigi.