Jodie Foster réðst á aðdáanda

Samkvæmt vefmiðlinum RadarOnline á leikkonan Jodie Foster að hafa ráðist á ungan pilt fyrir utan kvikmyndahús í lok maí síðastliðins. Að sögn föður piltsins, sem er sautján ára gamall, hlaut hann skrámur og marbletti á handlegg við árásina.

 „Sonur minn var á leið í bíó ásamt kærustu sinni þegar hann sá Jodie. Hann er mikill aðdáandi hennar og gekk í áttina að henni og tók nokkrar myndir. Hún elti hann, potaði í hann og sagði: „Átt þú einu sinni móður, viðbjóðurinn þinn?"

Sonur minn svaraði ekki fyrir sig heldur bað hana afsökunar og var í raun mjög hræddur við hana," sagði faðirinn, sem vildi ekki greina frá nafni sínu. Fórnarlamb árásinnar fór því næst upp á lögreglustöð ásamt föður sínum og lagði fram kæru.

Jodie Foster á tvo syni, Charles og Christopher, sem voru með henni þegar árásin átti að hafa átt sér stað. Leikkonan hefur aldrei gefið nokkuð upp um faðerni sona sinna og er mjög dul þegar kemur að einkalífi hennar sjálfrar.