Skurðstofum Heilbrigðisstofnunar Suðurnesja verður lokað

Skurðstofum Heilbrigðisstofnunar Suðurnesja í Reykjanesbæ verður lokað þann 1. maí næstkomandi samkvæmt uppsagnarbréfi til starfsmanna á skurðstofum. Þetta kemur fram á fréttvef Víkurfrétta.

Átta starfsmenn vinna á skurðstofum HSS sem missa allir vinnuna. Fleiri starfsmenn HSS mega vænta uppsagnarbréfa, samkvæmt heimildum blaðsins, sem benda til að allt að 14 starfsmönnum ætti að segja upp til að ná markmiðum um þann niðurskurð sem stofnunin þarf að sýna.

Víkurfréttir segja að Suðurnesjamenn muni ekki taka þessum niðurskurði Heilbrigðisstofnunar Suðurnesja þegjandi, því verið sé að færa þjónustuna áratugi aftur í tímann og vísa sjúklingum til Reykjavíkur.