Fjórir voru í flugvélinni - einn alvarlega slasaður

Einn einstaklingur er alvarlega slasaður eftir að lítil flugvél af gerðinni Cessna brotlenti nálægt sumarhúsalandi við Flúðir um klukkan fjögur í dag.

Alls voru fjórir um borð í flugvélinni. Tveir þeirra eru minna slasaðir og sá fjórði er með minniháttar meiðsl.

Þyrla landhelgisgæslunnar er á leiðinni á slysstað.

Björgunarsveitin Eyvindur frá Flúðum, Björgunarsveit Biskupstungna og Björgunarfélag Árborgar mættu fyrstir á vettvang.

Þegar að var komið voru allir með meðvitund.

Meðlimir björgunarsveita hlúa nú að hinum slösuðu þar til þyrla LHG kemur á staðinn.