Tómatar urðu kannabis

Fjórir karlmenn hafa verið dæmdir í fangelsi fyrir kannabisræktun og undirbúning vatnsræktunar sem gæti numið allt að 600 kannabisplöntum á bænum Karlsstöðum í Djúpavogshreppi. Þar fundust sextán plöntur.

Sá fjórmenninganna sem tók jörðina á leigu og hafði forgöngu um og fjármagnaði umfangsmiklar framkvæmdir við hina stóru kannabisverksmiðju var dæmdur í sex mánaða fangelsi. Einn hinna þriggja, sem sáu meðal annars um smíðar og fleiri framkvæmdir, var dæmdur í fimm mánaða fangelsi en hinir tveir í fjögurra mánaða fangelsi. Allir dómarnir voru óskilorðsbundnir. Mennirnir gáfu mismunandi skýringar á athöfnum sínum á Karlsstöðum.

Höfuðpaurinn kvaðst í fyrstu hafa ætlað að rækta tómata, en breytti því síðan í kannabisplöntur. Síðar kvaðst hann hafa verið hættur við kannabisræktunina vegna samviskubits. Loks sagðist hann fyrir dómi hafa ætlað að fara í ferðaþjónustu á jörðinni.

Dómurinn áleit það sannað, ekki síst þar sem settar höfðu verið upp tvær öflugar dísilrafstöðvar á bænum til að leyna mikilli orkunotkun, að mennirnir hefðu ætlað út í stórfellda ræktun.- jss