Íslenskar konur flykkjast í súludans eftir hátíðarnar

„Stelpum finnst þetta mjög spennandi. Þetta er líka svo hryllilega gaman," segir súludanskennarinn Inga Dungal.

Súlufitness hefur verið í boði á Íslandi síðustu ár og nú hafa Inga og Halldóra Kröyer opnað stúdíó í líkamsræktarstöðinni Jakabóli. Þær sérhæfa sig í súluformi, -dansi, -jóga og hinum djarfa burlesque-dansi. Fimmtán súlur hafa verið sérsmíðaðar og settar upp í stúdíóinu og ásóknin í námskeiðin er mikil að sögn Ingu, en hún byrjaði að auglýsa í byrjun vikunnar og síminn hefur ekki stoppað síðan.

„Allar stelpur sem byrja halda áfram. Flestar koma líka sjálfum sér alveg rosalega á óvart í fyrsta tímanum. Þær fara upp og á hvolf strax og þeim finnst alveg stórmerkilegt hvað þær geta," segir Inga.

Inga segir stóran mun á súludansi og súluformi, en sá síðarnefndi er meira líkamlega krefjandi. „Í súluformi eru þær að gera krefjandi æfingar," segir hún. „En í súludansi er meira um snúninga og dans. Þetta eru tvö rosalega mismunandi námskeið. Súluformið býr til vöðva alveg rosalega hratt en í súludansi eru stelpurnar meira sexí og að dilla sér. En þetta er ekki stripp, þær klæða sig ekki úr neinum fatnaði.

Það er semsagt ekki verið að þjálfa stelpur í að vera nektardansmeyjar?

„Nei. Á strippstöðunum eru þær að gera allt annað. Þessi list sem er á súluforminu er ekki inni á strippstöðunum. Þetta er meiri íþrótt. Tekur miklu meira á." Nánari upplýsingar er að finna á Facebook undir „súluform".

Josy Zareen býður upp á súlufitness í Happy Eyes Studio og segir líkamsræktina vera mjög vinsæla. „Það er algengt að fólk byrji um áramót," segir hún. „Málið með súluna er að hún styrkir hendurnar og lagar „bingóið" hratt." Josy vísar þar í spik sem safnast saman undir upphandleggnum.

„Ég byrjaði að auglýsa í vikunni og flest námskeiðin eru þegar full," segir Josy og bætir við að konur af öllum stærðum og gerðum sæki námskeiðin. „Konurnar líta á súluna og segjast ekki geta haldið sér á súlunni. En svo uppgötva þær að þær geta það. Allar konur geta það."

atlifannar@frettabladid.is