Þing Katalóníu greiðir atkvæði um bann við nautaati

Þing Katalóníu mun í dag greiða atkvæði um hvort banna eigi nautaat í þessu sjálfstjórnarhéraði á Spáni.

Atkvæðagreiðslan kemur í kjölfar undirskrifaherferðar þar sem 180.000 Katalóníubúar lýstu andstöðu sinni við þessa þjóðaríþrótt Spánverja. Dýraverndarsjónarmið réðu því að farið var í undirskriftaherferðina.

Samkvæmt frétt um málið á BBC er talið að mjótt verði á mununum í atkvæðagreiðslunni. Hægrimenn eru alfarið á móti því að banna nautaatið en flestir vinstri menn vilja fá slíkt bann.

Þetta er ekki í fyrstra sinn sem kosið er um nautaat innan sjálfstjórnarhéraða Spánar því nautaat var bannað á Kanaríeyjum árið 1999.