Varð nærri úti í Kópavogi

Lögreglan rannsakar nú tildrög þess að 35 ára gömul kona varð næstum úti um helgina, en hún fannst illa haldin skammt frá heimili sínu í Kópavogi á laugardagsmorgun.

Lítið er vitað um ferðir konunnar klukkutímana áður en hún fannst nær dauða en lífi, snemma síðastliðin laugardag.

Konan var mjög köld þegar hún fannst og bendir það til þess að hún hafi legið úti í nokkurn tíma áður nokkur varð hennar var þar sem hún lá skammt frá heimili sínu í Kópavogi.

Samkvæmt upplýsingum frá lögreglunni er ekki grunur um að neitt saknæmt hafi átt sér stað. Konan virðist hafa ætlað að ganga heim til sín frá íþróttahúsi í Garðabæ þar sem hún hafði verið á þorrablóti um nóttina en sem fyrr segir fannst hún svo morgunin eftir skammt frá heimili sínu í Salahverfi í Kópavogi.

Samkvæmt upplýsingum fréttastofu liggur konan á Landspítalanum við Hringbraut, en þar fengust engar upplýsingar um líðan hennar í dag.