Lömuð kona slasaðist vegna kæruleysis bílstjóra

Slys við flutning á fatlaðri konu hefur orðið til þess að Umferðarstofa vill endurskoða reglur um ábyrgð ökumanna. Konan, sem er mikið fötluð, slasaðist þegar verið var að flytja hana á milli staða í bíl í mars síðastliðnum. Hjólastóll konunnar var festur í bílinn en konan ekki í stólinn. Hún féll úr stólnum þegar bílstjórinn ók út á afrein. Konan er lömuð og gat því ekki tryggt sig þegar bíllinn beygði. Málið er komið til ákærusviðs lögreglunnar á höfuðborgarsvæðinu. Talið er að reglur um öryggisbúnað hafi ekki verið brotnar en ákvörðun um framhald málsins hefur ekki verið tekin.

Einar Magnús Magnússson hjá Umferðarstofu segir málið alvarlegt. Hann hafi haft spurnir af þessu máli og til séu fleiri dæmi um sambærileg slys. Slæmt sé ef bílstjórar átti sig ekki á þeim öryggisbúnaði sem er nauðsynlegur til þess að flytja fatlaða á milli staða.

„Það eru ákveðnir bílar sem eru til þess gerðir að flytja fatlaða og þá á ekki að flytja í öðrum bílum,“ segir Einar sem bendir á að gríðarlega mikilvægt sé að notaður sé réttur búnaður.

Einar segir mjög mikilvægt að bæði þeir sem reka akstursþjónustu fatlaðra og starfsmenn skoðunarstöðva séu vel á verði og farið sé eftir þeim reglum sem fram koma í reglugerð um gerð og búnað ökutækja.

Samkvæmt núgildandi lögum bera ökumenn ábyrgð á því að farþegar yngri en 15 ára noti öryggis- og verndarbúnað. Einar telur hins vegar nauðsynlegt að skoða hvort ekki þurfi að auka þessa ábyrgð enn frekar þannig að áður en lagt er af stað beri ökumenn jafnframt ábyrgð á því að fatlaðir farþegar á öllum aldri noti réttan öryggisbúnað í þeim tilfellum þar sem þeir geti ekki sjálfir axlað þá ábyrgð einir og óstuddir. - sbt