10 milljarðar í þróun og framkvæmd

Rammasamningur milli Akureyrarbæjar og Strokks Energy ehf. var undirritaður á Akureyri í síðustu viku. Samningurinn kveður á um að koma á fót koltrefjaverksmiðju á Akureyri, fyrstu sinnar tegundar á landinu. Akureyrarbær leggur til lóð á Rangárvöllum við rætur Hlíðarfjalls, nálægt höfuðstöðvum Norðurorku.

Staðsetning verksmiðjunnar býður upp á endurnýtingu metangass sem unnið verður úr sorphaugum Akureyrar á Glerárdal og sýna mælingar fram á að þaðan sé hægt að vinna nægilegt magn gass til verksmiðjunnar næstu tuttugu árin. „Þetta er besta staðsetning til stóriðju af þessu tagi á landinu,“ segir Eyþór Arnalds, framkvæmdastjóri Strokks. „Þetta er vissulega stórt og mikið verkefni, en það er mikilvægt að gera Ísland að áhugaverðum fjárfestingarkosti að nýju fyrir erlenda aðila.“

Enn er ekki komin kostnaðar­áætlun fyrir verkefnið, en gróflega er reiknað með 10 milljörðum króna í þróunarvinnu og framkvæmd verksmiðjunnar. „Þetta er spennandi verkefni og mikilvægt fyrir Akureyrarbæ að auka fjölbreytni og framboð á vinnumarkaðnum,“ segir Hermann J. Tómasson, bæjarstjóri Akureyrar, en verksmiðjan gæti skapað hátt í 100 störf. -sv