100 milljarðar í Helguvík

Framkvæmdir við álver í Helguvík standa undir 100 milljörðum af þeirri 265 milljarða króna fjárfestingu í raforkumannvirkjum og orkufrekum iðnaði, sem stefnt er að í ár og næstu þrjú ár.

Í yfirlýsingu sem iðnaðarráðuneytið sendi frá sér í gær kemur fram að auk Helguvíkur verði fjárfest í orkumannvirkjum fyrir 126 milljarða króna í ár og næstu þrjú ár.

Aðrar helstu framkvæmdir verði vegna aukinnar afkastagetu álversins í Straumsvík og lagningar Suðvesturlínu.

Virkjanir, sem samið hefur verið um vegna fyrsta og annars áfanga álversins í Helguvík, tryggja 325 megavött (MW) af þeim 625 MW sem þarf fyrir fullbyggt 360.000 tonna álver. Það sem á vantar fyrir álverið komi frá nýjum jarðvarmavirkjunum á Hellisheiði (135 MW) og í Krísuvík (200 MW).

Aðrar virkjanaframkvæmdir sem ráðuneytið nefnir að hefjist á næstu árum eru, auk Búðarhálsvirkjunar, á háhitasvæðum á Suðvesturlandi, það er stækkun Hellisheiðarvirkjunar, virkjanirnar í Hverahlíð og við Gráuhnjúka og við Eldvörp, auk stækkunar Reykjanesvirkjunar.

Alls verði fjárfesting í orkumannvirkjum 170 milljarðar fram til 2017 en heildarfjárfesting í stóriðju og raforku verði þá 400 milljarðar. - pg