Sveitarfélögum settar fjármálareglur

Unnið er að endurskoðun laga og reglna um fjármál sveitarfélaga í samgöngu- og sveitarstjórnarráðuneytinu. Stefnt er að því að setja sveitarfélögum fjármálareglur þar sem fram koma viðmiðanir um leyfilega skuldsetningu.

Nýlega voru sveitarfélögunum gefin fyrirmæli um að láta allar skuldbindingar sínar koma fram í efnahagsreikningi. Auk 210 milljarða heildarskulda hafa 45 milljarða skuldir sveitarfélaga ekki komið fram í reikningsskilum til þessa. Einkum er þar um að ræða fjármögnunarleigusamninga vegna ýmissa fasteigna.

Kristján L. Möller, samgöngu- og sveitarstjórnarráðherra, sagði við Fréttablaðið að hann stefndi að því að leggja á næstunni fyrir Alþingi frumvarp um endurskoðun á fjármálakafla sveitarstjórnarlaga. Heildarendurskoðun laganna stendur yfir og er stefnt að því að ný löggjöf taki gildi um næstu áramót. Kristján sagði þó að ráðuneytið teldi nauðsynlegt að fara í „bráðaaðgerð" og lagfæra fjármálakafla núgildandi laga fyrir þingfrestun í vor.- pg