Ísbjarnasamtök harma birnudráp

Samtökin Polar International harma ísbjarndrápið á Íslandi í lok janúar en tónlistarkonan Sigurlaug Knudsen Stefánsdóttir vakti athygli samtakanna á málinu. Í pósti sem þeir senda á Sigurlaugu segjast samtökin búast við því að fleiri birni leiti til samfélaga á Norðurlöndunum eftir því sem ísinn bráðnar.

Aftur á móti taka samtökin fram að hver og ein ríkisstjórn, sem stendur frammi fyrir slíku vandamáli að þurfa að fella eða bjarga ísbirni, þurfi að taka eigin ákvarðanir. Markmið samtakanna sé hinsvegar að aðstoða samfélög til þess að búa í sátt og samlyndi með ísbjörnum.

Þá hafa samtökin komið saman hópi og hyggjast bjóða fram aðstoð sína.

Samtökin segjast hafa haft samband við íslensk yfirvöld árið 2008 eftir að tveir ísbirnir voru drepnir. Samtökin segja ætlunin að gera slíkt hið sama aftur.