Gríðarlegur áhugi á eldgosinu

Yfir hundrað manns hafa lagt leið sína að eldstöðvunum í Eyjafjallajökli í dag. Unnið er að því að setja upp aðstöðu í Fljótshlíð til að almenningur geti séð gosið þaðan.

Umferð um Þórsmörk og Eyjafjallajökul er enn bönnuð. Hins vegar er leiðin upp Fimmvörðuháls opin fyrir göngufólk. Gríðarlegur áhugi er á gosinu og hafa yfir hundrað manns lagt leið sína að eldstöðvunum í dag. Talið er að tugir gönguhópa hafi verið þar á ferðinni og auk fjölda vélsleðamanna.

„Það hefur verið talsverð umferð ferðamanna og við vitum af nokkrum gönguhópum sem hafa verið að ganga Fimmvörðuhálsinn og farið að eldstöðinni þar," segir Víðir Reynisson, deildarstjóri Almannavarnadeildar Ríkislögreglustjóra.

Fimm klukkutíma tekur að ganga að eldstöðinni og segir Víðir mikilvægt að fólk fari varlega. „Það er öskufall sem er óþægilegt og síðan er logandi gjall frá eldstöðinni hættulegt," segir Víðir. Þarna verði miklar sprengingar. „Það eru miklar kraftar þarna á ferðinni og fólk verður að fara varlega."