Gylfi hundskammar ríkisstjórnina

Gylfi Arnbjörnsson, forseti ASÍ, sakar ríkisstjórnina og einkum félagsmálaráðherra um að rjúfa áratuga langa sátt aðila vinnumarkaðarins og stjórnvalda um samábyrgð á málefnum vinnumarkaðarins með stofnun Vinnumarkaðsstofnunar sem verður til með sameiningu Vinnumálastofnunar og Vinnueftirlitsins. Þessari nýju stofnun sé ætlað að gegna lykilhlutverki við þróun vinnumarkaðar á Íslandi í framtíðinni. Hugmyndir um þessa nýju stofnun hafa verið unnar án nokkurs samráðs við ASÍ eða aðra aðila vinnumarkaðarins.

Í bréfi Gylfa til Jóhönnu Sigurðardóttur forsætisráðherra segir hann að ríkisstjórnin hafi með þessari ákvörðun slitið á öll formleg tengsl og aðkomu aðila vinnumarkaðarins að þeim verkefnum sem Vinnumarkaðsstofnun muni hafa með höndum. Allt vald sé fært í hendur ráðherra og forstjóra stofnunarinnar sem starfi í umboði ráðherra. Gylfi segir að samstarf og samábyrgð á málefnum vinnumarkaðarins hafi verið eitt af einkennum norræna velferðarkerfisins og jafnframt einn helsti styrkur þess. Þar komi einnig fram að ASÍ muni aldrei sætta sig við þá stefnubreytingu yfirvalda sem með þessu er boðuð.

Þá gagnrýnir forseti ASÍ ríkisstjórnina harðlega fyrir vanefndir á samkomulagi um greiðslur ríkissjóðs vegna starfsendurhæfingar þeirra sem lent hafa í áföllum vegna veikinda og slysa. Hann segir að samkomulag stjórnvalda og aðila vinnumarkaðarins þessa efnis hafi verið gert í tengslum við kjarasamningana í febrúar 2008 og áréttað í stöðugleikasáttmálanum í júní í fyrra. Óumdeilt sé að með samkomulaginu hafi verið stigið mikilvægt skref til að treysta réttindi og möguleika fólks á vinnumarkaði eftir áföll og um leið mikilvægt framfaraskref fyrir samfélagið í heild. Enn hafi ríkisstjórnin ekki staðið við sinn hluta samningsins, þrátt fyrir samkomulag um verulega lækkun á framlögum ríkisins vegna erfiðrar stöðu ríkisfjármála.