Stór atburður hjá litlu félagi

Bandalag íslenskra skáta er nær öruggt um að fá að halda heimsmót róverskáta hér á landi árið 2017. Mótið verður langstærsti alþjóðlegi viðburðurinn sem íslenskir skátar hafa staðið fyrir frá upphafi.

Heimsmót róverskáta eru ætluð skátum á aldrinum 18 til 26 ára, og búast má við á bilinu 6.000 til 8.000 skátum hingað til lands á mótið, segir Bragi Björnsson skátahöfðingi. Mótin eru haldin fjórða hvert ár í mismunandi löndum. Bandalag íslenskra skáta hefur eitt sótt um að halda mótið árið 2017.

„Þetta er mjög gott tækifæri og mikill heiður fyrir okkur,“ segir Bragi. Enginn keppir við íslensku skátana um að fá að halda mótið þetta árið, en eftir er að staðfesta endanlega að það verði haldið hér. Bragi segir efnahagsmálin vissulega hafa komið upp í umsóknarferlinu, en íslenska skátahreyfingin sé vel rekin og hafi alla burði til að standa fyrir svo stóru móti.

„Þetta er í fyrsta skipti sem svo lítið bandalag hefur tekið að sér svo stóran atburð,“ segir Bragi. Hann segir að íslenskum skátum sé treyst fyrir svo stóru móti þar sem afar vel hafi tekist til þegar Roverway-skátamótið var haldið hér á landi í fyrra.

„Þjóðirnar sáu hvað við stóðum okkur vel síðasta sumar, Ísland er spennandi land að heimsækja, og þetta verður gott tækifæri fyrir þetta unga fólk til að heimsækja það sem í hugum margra er mjög framandi land,“ segir Bragi. - bj