HÍ kynnir framhaldsnám

Háskóli Íslands mun kynna allt framhaldsnám við skólann í dag. Kynningin fer fram á Háskólatorgi og munu öll fimm fræðasvið Háskólans kynna möguleika sem í boði verða í framhaldsnámi á næsta skólaári. Kynningin verður milli kl. 16-18.

Nú eru um fjögur þúsund nemendur skráðir í framhaldsnám við Háskólann, þar af á fimmta hundrað í doktorsnám. Meistara- og doktorsnám kallast einu orði framhaldsnám. Meistaranám er önnur háskólagráða og henni lýkur með MA, MS eða M.Ed. gráðu. Námið tekur að jafnaði tvö ár.

Doktorsnám tekur að jafnaði 3-6 ár og lýkur með Ph.d. gráðu. Einnig býður Háskólinn ýmsar styttri námsleiðir á framhaldsstigi, t.d. diplómanám, hagnýtt nám og nám til starfsréttinda, segir í tilkynningu frá Háskóla Íslands.