Fá að halda barninu þrátt fyrir grunsemdir um misþyrmingar

Hæstiréttur Íslands staðfesti dóm Héraðsdóms Reykjaness um að móðir ungabarns og sambýlismaður hennar fái að hafa barnið á heimili sínu þrátt fyrir að lögreglan á Suðurnesjum rannsaki meint ofbeldi gegn barninu.

Í dómi héraðsdóms kemur fram að móðir barnsins hafi farið með það í reglulegt ungbarnaeftirlit en þar vaknaði grunur um að barnið gæti verið með vatnshöfuð vegna hratt vaxandi höfuðmáls.

Í kjölfarið var drengurinn skoðaður af barnalækni og taugasérfræðingi, sem leiddi til þess að drengurinn var lagður inn á Barnaspítala Hringsins í ágúst 2009. Eftir frekari rannsóknir á drengnum var talið að unnt væri að útiloka að sjúkdómar eins og vatnshöfuð eða blóðstorknunarsjúkdómur skýrðu þau einkenni sem drengurinn hafði. Talið var að umtalsverðar líkur væru á því að drengurinn hefði orðið fyrir ytri áverka, s.s. verið hristur eða fengið höfuðhögg.

Barnið var því fjarlægt af heimili móður þess og sambýlismanni hennar og fært í tveggja mánaða fóstur en barnaverndaryfirvöld kröfðust þess að barnið yrði vistað þar í hálft ár til viðbótar.

Lögreglan á Suðurnesjum lauk svo rannsókn málsins og tilkynntu að hún væri látin niður falla. Barnavernd kærði málið til ríkissaksóknara sem skipaði lögreglunni á Suðurnesjum að taka málið aftur upp. Því stendur rannsókn enn yfir og eru móðirin og sambýlismaðurinn grunuð um að hafa veitt barninu áverkana.

Í dómi Héraðsdóms Reykjaness, sem Hæstiréttur staðfesti, kemur fram, að í ljósi þess að barnaverndareftirlitið sé með öflugt eftirlit með barninu og heimili þess, en það gera þau með reglulegum heimsóknum, þá sé hægt að tryggja barninu öryggi þó svo að foreldri og sambýlismaðurinn sæti lögreglurannsókn grunuð um að hafa misþyrmt barninu.

Því féllst Héraðsdómur Reykjaness ekki á kröfu barnaverndar og Hæstiréttur staðfesti dóminn í dag. Barnið verður áfram á heimilinu.