Vinningshafar í áfalli - ætla að greiða niður skuldir

Íslensku hjónin sem urðu 66,4 milljónum ríkari þegar þau unnu í Víkingalottóinu í gær ætla að borga niður skuldir og taka sér gott sumarfrí.

Eiginkonan heyrði í útvarpinu í að miðinn hefði verið seldur hjá N1 og hringdi í manninn sinn sem sagði henni hverjar væru vinningstölurnar. Í ljós kom að hún var með réttan miða og var fljót að koma til Íslenskrar getspár með miðann góða, að fram kemur í tilkynningu frá Íslenskri getspá.

„Viðkomandi var í hálfgerðu áfalli en fyrsta hugsun sem kom upp í hugann var að greiða niður skuldir, njóta lífsins og taka sér gott sumarfrí," segir í tilkynningunni. Þar segir jafnframt að vinningurinn komi í góðar þarfir hjá þessari fjögurra manna fjölskyldu sem er með bæði langtíma- og skammtímaskuldir sem nú sé hægt að losa sig við.