Dæmdur í meðferð eftir ítrekuð brot

Karlmaður var, í Héraðsdómi Suðurlands í dag, dæmdur í tveggja mánaða skilorðsbundið fangelsi og til að sækja áfengismeðferð á meðferðarstofnun í allt að eitt ár fyrir ítrekuð áfengislagabrot.

Maðurinn var meðal annars dæmdur fyrir að hafa dvalist ölvaður í heimildarleysi í sorpgeymslu fjölbýlishúss á Selfossi þar sem hann dvaldi þegar að lögregla hafði afskipti af honum og valdið íbúum þannig ónæði og raskað næturró þeirra. Þegar lögregla hafði afskipti af honum neitaði hann að hlíta fyrirmælum um að fylgja lögreglumönnum frá staðnum og sparkaði í lögreglumann við handtöku. Þá hefur maðurinn ítrekað gerst sekur um hneykslan á almannafæri undir áhrifum áfengis.

Maðurinn játaði brot sín fyrir dómi í dag.