Vara við eiturgufum frá eldgosinu

Búist er við mikilli umferð almennings við gosstöðvarnar á Fimmvörðuhálsi í dag og næstu daga. Af því tilefni varar Slysavarnafélagið Landsbjörg við hættulegum eiturgufum sem fylgja eldgosum eins og þessu. Um er að ræða brennistein, flúor, koltvísýring og kolmonoxíð sem eru lyktarlaus og banvæn. Efnin eru leysandi og geta valdið varanlegum lungnaskaða sé þeim andað að sér.

Eiturgösin eru þung og leka með jörðinni. Fólk er því varað við að fara inn í Hrunagil þar sem hraun lekur nú niður því gilið er þröngt og líklegt að mikið sé um eiturgös þar.

Einnig er fólki sem er uppi á Fimmvörðuhálsi við eldstöðvarnar bent á að forðast lægðir ef veður er stillt, halda sig á hólum og hæðum og standa undan vindi.