Yfirgefinn gúmbátur í höfninni í Bolungarvík

Lögreglan á Ísafirði lýsir eftir eiganda að Zodiac gúmbát sem verið hefur í höfninni í Bolungarvík frá því í sumar. Að sögn lögreglunnar dúkkaði báturinn upp í sumar og bjuggust menn við því að eigandinn kæmi að vitja hans. Þetta var á svartfuglsveiðitímabilinu og gengu menn út frá því að um veiðimenn hefði verið að ræða enda voru skot um borð í bátnum.

Leið og beið og ekkert gerðist og þegar kom fram í október var báturinn hífður á land. Lögreglan vill ekki gefa mjög greinargóða lýsingu á bátnum enda þarf eigandinn að sýna fram á það með einhverjum hætti að hann eigi sannarlega bátinn, gefi hann sig fram. Þó er gefið upp að hann er með Evanrude utanborðsmótor.

Þeir sem gætu gefið einhverjar upplýsingar varðandi bátinn eru vinsamlegast beðnir um að hafa samband við lögregluna á Vestfjörðum í síma 450-3730.