Ísfélagið bíður eftir svörum frá Chile

Enn ríkir óvissa um afgreiðslu skipasmíðastöðvarinnar ASMAR í Chile á tveimur öflugum skipum til Ísfélagsins í Vestmannaeyjum. Stöðin stórskemmdist í jarðskjálfta 27. febrúar. Forsvarsmenn ASMAR halda því fram að þeir séu ekki bundnir af smíðasamningum skipanna þar sem fyrirsjáanlegar vanefndir á afhendingu skipanna eru til komnar vegna náttúruhamfara.

„Skipasmíðastöðin ber fyrir sig „force majeure“-ákvæðinu í samningnum og þar stendur málið núna,“ segir Stefán Friðriksson, framkvæmdastjóri Ísfélagsins. „Satt best að segja vitum við ekki hvert framhaldið verður og bíðum svara að utan um hvað þeir ætla að gera. Mér skilst að þeir ætli að klára nýja varðskipið Landhelgisgæslunnar, svo það sama getur átt við um okkar skip.“

Stefán segir ljóst að fyrirtækið verði ekki fyrir fjárhagslegu tjóni vegna tafa eða skemmda. Ísfélagið hefur ekki samið um sölu á öðrum skipum fyrirtækisins vegna endurnýjunar skipakostsins. Þess vegna muni framvinda málsins, hver sem hún verður, ekki hafa nein áhrif á rekstur Ísfélagsins.

Kaupverð skipanna tveggja var um fjórir milljarðar króna við undirskrift, samkvæmt heimildum Fréttablaðsins. Gengisþróun eftir hrun hefur nær tvöfaldað þá upphæð. Ísfélagið hefur þegar greitt kaupverð skipanna að hluta. Smíði annars skipsins er langt komin og var það væntanlegt til landsins seint á þessu ári. Áætlað var að seinna skipið kæmi til landsins fyrri hluta árs 2011.

Ef tafir verða fram úr hófi er ein af mögulegum leiðum Ísfélagsins að segja sig frá samningnum. „Við vonum hins vegar að þeir komist af stað og ljúki smíði skipanna,“ segir Stefán og bætir við að vel komi til greina að selja annað skipið vegna þeirra hækkana sem gengisþróun síðustu mánaða hefur valdið.

Björgvin Ólafsson, framkvæmdastjóri BP-skipa hf., sem er umboðsaðili ASMAR á Íslandi, segir að verið sé að meta skemmdirnar í stöðinni, sem hafi verið gríðarlegar. Hann telur meiri líkur en minni á því að íslensku skipin verði kláruð í stöðinni.

svavar@frettabladid.is