Ungmenni stökkva í Sogið - veiðimenn saka lögreglu um viðbragðsleysi

Stangveiðifélag Reykjavíkur varar ungmenni við því að stökkva ofan í Sogið. Í tilkynningu frá félaginu eru veiðimenn og aðrir hvattir til að tilkynna um þetta hættulega háttaleg til lögreglunnar. Félagið gagnrýnir lögregluna fyrir að taka ekki ábendingar um stökkin alvarlega.

„Veiðimenn í Sogi hafa undanfarna daga tilkynnt skrifstofu um hættulegt athæfi ungmenna á brúnni við Alviðru og Þrastarlund. Hefur hópurinn verið að stökkva fáklæddur af brúnni, sem er engin smásmíði, og ofan í þungan og kaldan strauminn niður undan veitingaskálanum í Þrastarlundi," segir í tilkynningunni.

Þar segir jafnframt að veiðimaður hafi um helgina hringt í lögregluna og greint frá því að hópur ungmenna væri að stökkva fram af brúnni við Þrastarlund í Sogið. Veiðimaðurinn hefði hins vegar talað fyrir daufum eyrum og enginn mætt á svæðið til að skakka leikinn.

„Veiðimenn þekkja það manna best að Sogið ber nafn með rentu, og það mikla vatnsfall hefur svo sannarlega tekið mannslíf í gegnum tíðina... Enginn björgunarhringur er á brúnni þar sem lífdagar þeirra hafa verið stuttir og þeim stolið jafn harðan og þeir eru settir á brúarhandriðið. " segir í tilkynningunni.

Það skal þó tekið fram að í frétt Vísis um stökk ungmenna í Sogið frá 19. júlí er haft eftir lögreglunni að hún hafi mætt á svæðið og skakkað leikinn.