Rækjuvinnslufólk styður ráðherra

Starfsfólk stærstu rækjuvinnslu á landinu hefur sent frá sér yfirlýsingu til stuðnings ákvörðun sjávarútvegsráðherra um að gefa veiðar á úthafsrækju frjálsar. Framkvæmdastjóri vinnslunnar segir að með ákvörðun ráðherra aukist aðgengi að hráefni sem sé atvinnuskapandi.

„Þetta er í sjálfu sér ekkert flókið mál. Með ákvörðun ráðherra mun aðgengi að hráefni aukast og það er gott fyrir atvinnu bæði á sjó og í landi," segir Þröstur Friðfinnsson, framkvæmdastjóri Dögunar sem er rækjuvinnsla á Sauðarkróki.

Forsvarsmenn LÍÚ hafa haldið því fram að rækjuvinnsla muni jafnvel leggjast af verði veiðarnar gefnar frjálsar segir Þröstur: „Það eru mjög sérstök rök að ef aðgengi að hráefni batnar leggist vinnsla af. Það er ljóst að öll aukin rækjuveiði við Ísland mun koma þeim rækjuvinnslum sem eru í landinu til góða."

Þröstur gagnrýnir þá umfjöllun sem verið hefur um ákvörðun ráðherra og segir ekki gæta jafnvægis í henni.

„Okkur finnst þetta vera ansi einhliða umfjöllun og því miður er ekki talað um hagsmuni vinnslunar af raunsæi. Við hjá Dögun höfum síðustu árin verið stærsta rækjuvinnslan á landinu en aðilar LÍÚ hafa ekki haft áhuga á að tala við okkur eða boða okkur á fundi vegna málsins. Við furðum okkur á því."

Þröstur segir að Dögun eigi smávegis af rækjukvóta og muni því tapa einhverju þegar veiðarnar verði gefnar frjálsar. Hann býst hins vegar fastlega við því að bætt aðgengi að hráefni muni vega upp á móti því tapi."

Starfsmenn Dögunar hafa allir skrifað undir stuðningsyfirlýsinguna og verður hún send sjávarútvegsráðherra. Þröstur segir mikilvægt að færa umræðuna á vitrænt plan. „Það hafa verið ansi stóryrtar yfirlýsingar frá útgerðarmönnum í fréttum, það er talað um að Byggðastofnun sé í hættu, sem eru mjög hæpin rök. Rækjukvótinn hefur ekki verið veiddur til fulls síðustu tíu árin og kvóti sem enginn vill veiða er ekki verðmætur. Það er engin lánastofnun með viti sem lánar út á verðlausan kvóta."