Bæjarstjórinn kannast ekki við ásakanir Gunnars

Bæjarstjórinn í Kópavogi kannast ekki við að hafa lekið upplýsingum til að skaða Gunnar Birgisson, fyrrverandi bæjarstjóra, í aðdraganda prófkjörs sjálfstæðismanna í bæjarfélaginu sem fór fram um helgina. Hann hafi einungis verið að vinna vinnuna sína.

Gunnar hafnaði í þriðja sæti í prófkjörinu en hann sóttist eftir fyrsta sætinu. Í viðtali við Pressuna segir Gunnar að úrslitin hafi komið sér á óvart. Mikill óhróður og rógur hafi verið í aðdraganda prófkjörsins. Gunnsteinn Sigurðsson, núverandi bæjarstjóri og flokksbróðir hans, hafi til að mynda lekið upplýsingum af bæjarskrifstofunni til að skaða Gunnar.

„Ég veit ekki hvað Gunnar er að tala um. Ég kannast ekki við þetta. Fréttamenn hafa fengið þær upplýsingar sem þeir hafa beðið um og þeir eiga rétt á. Ég hef bara verið að vinna vinnuna mína," segir Gunnsteinn.

Gunnar hefur verið í leyfi sem bæjarfulltrúi frá því að lífeyrissjóðsmálið svokallaða kom upp síðasta sumar. Hann hyggst snúa aftur í bæjarstjórn í næsta mánuði. „Þetta er hans ákvörðun. Gunnar tók ákvörðun um að stíga til hliðar sínum tíma og spurði mig ekki ráða og það er eins með þetta," segir Gunnsteinn aðspurður um ákvörðun Gunnars að snúa aftur í bæjarstjórn.

Gunnsteinn vill ekki segja til um það hvort að átök meðal sjálfstæðismanna í bæjarfélaginu undanfarin misseri komi til með að skaða flokkinn í komandi kosningabaráttu.

„Það var gríðarlega mikil harka í þessu prófkjöri og viðbúið að einhverjir komi sárir út úr því. Ég held að það sé mikilvægt að láta nokkra daga líða og gefa mönnum tíma til að jafna sig," segir Gunnsteinn.