Lífeyrissjóðir bíða enn eftir verkefnum til að fjármagna

Nú þegar vorið nálgast og aðalframkvæmdatími ársins fer í hönd gætir vaxandi óþreyju með hversu hægt stjórnvöldum gengur að koma nýjum verkefnum af stað. Með undirritun stöðugleikasáttmálans í júní í fyrra var innsiglað samkomulag um að lífeyrissjóðir myndu fjármagna stórar framkvæmdir. Þeir hafa síðan beðið tilbúnir með peningana.

Arnar Sigurmundsson, formaður Landssamtaka lífeyrissjóða, segir að enginn sé sáttur við hvað þetta hafi gengið hægt. Það gildi jafnt um verkalýðshreyfinguna og þá sem komi frá lífeyrissjóðunum og hann trúi því ekki heldur að stjórnvöld séu sátt við þennan hægagang.

„Þannig að við verðum að vona það að menn fari að spýta í lófana og það fari eitthvað meira að gerast en búið er að vera undanfarna mánuði," segir Arnar.

Áform um samgöngumiðstöð á Reykjavíkurflugvelli hafa tafist í stympingum um skipulagsmál, nýr Landspítali er rétt að komast á hönnunarstig, óvissa er um orkuframkvæmdir og áform um að lífeyrissjóðir komi að vegagerð, eins og tvöföldun Suðurlandsvegar, eru lent í flókinni veggjaldaumræðu, þar sem ríkissjóður má ekki taka ný lán.

Menn þurfa þessvegna að hugsa þetta upp á nýtt, segir Arnar. Það taki sinn tíma, ekki síst innan stjórnkerfisins að vinna því fylgi.

Spurður hvort hann sjái einhverjar alvöru framkvæmdir fara í gang á næstu mánuðum, fyrir tilverknað lánsfjár frá lífeyrissjóðunum, svarar Arnar að mestar líkur séu á að framkvæmdir við samgöngumiðstöð geti orðið fyrstar. Með sama áframhaldi verði það þó aldrei fyrr en í fyrsta lagi í vor en til að það gangi eftir þurfi að halda vel á spöðunum.