Dæmi Íslands má ekki endurtaka

„Öll erum við sammála um að bankakreppa á við kreppuna á Íslandi megi ekki koma upp aftur,“ sagði Dominique Strauss-Kahn, framkvæmdastjóri Alþjóðagjaldeyrissjóðsins (AGS), í ræðu sinni á ráðstefnu framkvæmdastjórnar Evrópusambandsins (ESB), í gær. Ráðstefnan fjallaði um hvernig koma mætti á regluverki áfallastjórnunar á sameiginlegum fjármálamarkaði sambandsins.

Um leið áréttaði Strauss-Kahn að „sorglegt“ dæmi Íslands væri ekki til marks um ágalla þess að fjármálafyrirtæki gætu starfað á einum markaði í mörgum löndum, heldur væri það afsprengi regluverksins sem komið hafi verið á, reglunni um að heimaríki fjalli um mál viðkomandi fyrirtækja.

„Vandkvæðin við stjórn heimaríkisins eru mörg, sér í lagi þegar stjórninni fylgja ekki trúverðugar og raunhæfar leiðir til samábyrgðar. Við höfum mátt horfa upp á að þessi háttur ýtir ekki endilega undir samvinnu á erfiðleikatímum,“ sagði hann og kvað ríkjandi fyrirkomulag líka ýta undir vandamál þar sem fjármálafyrirtæki verði „of stór til að þeim verði bjargað.“

Strauss-Kahn hvatti til enn frekari umbóta til að koma á evrópskri áfallastjórnun og regluverki til úrlausna í málefnum fjármálafyrirtækja. Það væri áskorunin sem stjórnmálamenn þyrftu nú að standa undir. „Tækifærinu til úrbóta ætti ekki að sóa eða fresta.“ - óká