Bjarni: Möguleikar Íslendinga betri en annarra þjóða

Bjarni Benediktsson, formaður Sjálfstæðisflokksins, segir að Íslendingar eigi betri möguleika á því að vinna sig út úr kreppunni en önnur lönd. Þetta kom fram í máli Bjarni þegar að hann hélt opnunarávarp á fundi sem rúmlega eitthundrað flokksmenn norska Framfaraflokksins héldu í Reykjavík í morgun.

Bjarni ræddi framtíð Íslands og þau sóknarfæri sem felast í endurreisninni. Hann sagði að menntunarstig þjóðarinnar væri hátt og sjálfsbjargarviðleitnin væri mikil. Hann sagði að atvinnumál væri stærsta velferðarmál Íslendinga og að tækifærin til atvinnuuppbyggingar væru til staðar. Hann lagði áherslu á verðmætasköpun og að skapa ný störf væri forgangsverkefni.

Á fundinum þakkaði Bjarni jafnframt Norðmönnum fyrir að ætla ekki að láta afgreiðslu Icesave-málsins hafa áhrif á lánafyrirgreiðslu til Íslands. Eftir því sem fram kemur í tilkynningu frá Sjálfstæðisflokknum átti Bjarni líka fund með Siv Jensen formanni Framfaraflokksins í morgun. Þar ræddu formennirnir saman um atvinnumál.