Fremstu vefhönnuðir heims til landsins

„Ísland, Sílíkondalur norðursins, er meðal mest spennandi staða í tæknibransanum um þessar mundir. Hér er nóg af góðum hugmyndum, flottum nýsköpunarfyrirtækjum og umhverfisvænum orkuskýjum."

Svona hljóðar meðal annars lýsingin á ráðstefnunni Iceweb sem hefst á morgun. Hún er haldin á vegum SVEF, Samtaka vefiðnaðarins á Íslandi, og kemur fjöldi af fremstu vefhönnuðum heims hingað til lands til að sækja hana.

„Þetta er þriðja Iceweb-ráðstefnan. Við héldum þá fyrstu árið 2006. Þá var áherslan lögð á að flytja vefiðnaðinn inn í framtíðina, það er að vinna vefi eftir ákveðnum vinnubrögðum og forrita eftir vefstöðlum. Þetta bar góðan árangur og nú stöndum við framarlega hér á landi," segir Einar Þór Gústafsson, formaður SVEF.

Ráðstefnan er áfram með puttann á púlsinum og þetta árið er áherslan lögð á textaskrif og efnisstjórnun á vefnum. „Efni og innihald vefja er oft á tíðum ekki nógu gott. Vandamálum tengdum tækninni hefur farið fækkandi en efnið og innihaldið er jafnan sem mætir afgangi þegar hönnun og frágangi á tæknilegum atriðum er lokið," segir Einar.

Einnig verða fluttir fyrirlestrar um farsímavefi, hvernig notendur haga sér á netinu, samfélagsvefi og margt fleira. Fjöldi virtra erlenda sérfræðinga tekur til máls en Iceweb hefst í dag með vinnustofum. Á morgun fer ráðstefnan sjálf síðan fram á Hótel Loftleiðum.

Viðbrögð hafa verið afar góð en hægt er að afla sér frekari upplýsinga um skráningu og dagskrá á heimasíðu ráðstefnunnar, icewebconference.com.