Grjótkastarinn íhugar að keyra inn á Alþingi

„Það er ekki þér að þakka að við fengum ekki grjótið í andlitið," hreytti lögreglumaður í Aðalheiði Gunnlaugsdóttur þegar blaðamaður ræddi við hana fyrir utan Seðlabankann í hádeginu í dag. Aðalheiður játaði að hafa kastað grjóti í áttina að lögreglunni en minnstu munaði að það hefði farið í höfuðið á einum lögreglumanninum sem blaðamaður ræddi við.

Aðalheiður svaraði engu þegar lögreglumennirnir gengu framhjá henni.

„Ég miðaði nú á þakið á Seðlabankanum, ég dreif bara ekki," sagði Aðalheiður um grjótkastið en tveir lögreglumenn ræddu við hana eftir mótmælin og tóku niður persónuupplýsingar hennar. Ekki er ólíklegt að hún verði kærð fyrir brot gegn valdstjórninni.

Sjálf sagði Aðalheiður að grjótkastið hefði verið skilaboð til stjórnvalda þegar lögreglan hafði afskipti af henni. Í samtali við blaðamann sagðist hún eiga í mjög erfiðri fjárhagsstöðu þessa daganna.

„Ég skulda um tíu milljónir í bílalánum," sagði Aðalheiður en aðspurð segir hún gengisdóminn, sem féll á dögunum, ekki hafa haft mikil áhrif enn sem komið er. Hún er ósátt við tilmæli Seðlabankans og FME um að reikna skuli lánin út frá seðlabankavöxtunum.

„Til hvers hafa Hæstarétt," spurði Aðalheiður sem var einn af þeim fjögur hundruð mótmælenda sem tóku stöðu fyrir utan Seðlabankann og börðu á potta og pönnur í hádeginu í dag.

„Annars hef ég skrifað það að ég ætla að keyra inn á Alþingi," segir Aðalheiður sem sér ekki margar lausnir í sínu máli þrátt fyrir gengisdóminn.

Aðalheiður var ekki handtekin vegna málsins en einn mótmælandi var handtekinn fyrir að óhlýðnast tilmælum lögreglunnar. Þá lenti tónlistarkonan Ellen Kristjánsdóttir í átökum við lögregluna. Hún þurfti að leita sér aðhlynningar eftir átökin.