Dimitar Berbatov bestur í Búlgaríu í sjötta sinn

Dimitar Berbatov, framherji Manchester United, var í gær kosinn besti knattspyrnumaður Búlgaríu í sjötta sinn á ferlinum en hann setti með því nýtt met í þessu árlega kjöri. Berbatov hafði betur en Stilian Petrov hjá Aston Villa og Blagoy Georgiev hjá Terek Grozny sem komu í næstu sætum.

Hinn 28 ára gamli Berbatov hjálpaði Manchester United liðinu við að vinna enska meistaratitilinn þriðja árið í röð og þá varð hann einnig markahæsti landsliðsmaður Búlgaríu frá upphafi með því að skora tvennu á móti Möltu.

„Ég er mjög stoltur af því að vinna þessi verðlaun í sjötta sinn. Síðasta ár gekk mjög vel hjá mér, varð bæði enskur meistari og markahæsti búlgarski landsliðsmaðurinn frá upphafi. Þessi verðlaun kalla fram bros hjá mér," sagði Dimitar Berbatov.