Þingmenn Samfylkingarinnar vilja ECA Programs til Íslands

Bæði Björgvin G. Sigurðsson og Róbert Marshall, þingmenn Samfylkingarinnar í suðurkjördæmi, segjast styðja hugmyndir um að fyrirtækið ECA Programs hefji starfsemi á Íslandi. Eftir því sem fréttastofa kemst næst snúast hugmyndir fyrirtækisins að leigja þjóðum innan NATO samstarfsins gamlar rússneskar herþotur til heræfinga.

Róbert Marshall segir að um sé að ræða rekstrarfyrirtæki fyrir 18 æfingaþotur sem notaðar eru í æfingum víðsvegar í heiminum, ekki þó á Íslandi. Þær yrðu þjónustaðar og hafðar hér á Íslandi. „Þetta gæti þýtt um hundrað störf fyrir fólk á einu því svæði þar sem hvað mest atvinnuleysi er á landinu," segir Róbert.

Róbert segir að ekki sé um að ræða að einkaher verði staðsettur á Íslandi. „Þær fréttir koma mér mjög spánskt fyrir sjónir. Ég myndi gjarnan vilja vita hvað þeir sem halda því fram hafa fyrir sér í því efni. Þeir hljóta þá að hafa einhverjar upplýsingar sem ég hef ekki," segir Róbert. Þarna verði ekki hermenn og engar heræfingar við Ísland.

„Ég hef eftir fremsta megni reynt að leiðbeina þeim sem að þessu standa og bara vona að þetta gangi eftir. Vegna þess að þetta skiptir gríðarlegu máli á þessu svæði," segir Róbert. Róbert segir að margir þingmenn hafi fengið kynningu á verkefninu og verið velviljaðir því.