Kvartað undan reglum um mataraðstoð til Persónuverndar

Persónuvernd barst kvörtun fyrr í mánuðinum vegna breyttra reglna Hjálparstarfs kirkjunnar í matarúthlutun samtakanna. Fólk sem sækir sér aðstoð þarf nú að skila inn yfirliti yfir útgjöld og tekjur eftir fyrstu komu.

Sífellt færri eiga fyrir mat og þurfa á aðstoð hjálparsamtaka að halda. Allt að helmingsaukning hefur orðið hjá nokkrum þeirra á einu ári. Auk Hjálparstarf kirkjunnar úthluta Fjölskylduhjálp Íslands og Mæðrastyrksnefnd Reykjavíkur reglulega mat.

Vilborg Oddsdóttir, félagsráðgjafi hjá Hjálparstarfi kirkjunnar, sagði í samtali við fréttastofu í byrjun mánaðarins að samtökin hefðu áhyggjur af ástandinu. Úthlutunarreglunum þeirra hefði því verið breytt til að meta betur í hvaða stöðu fólk væri þegar tekin væri ákvörðun um hvort að veita skuli því aðstoð.

Þórður Sveinsson, lögfræðingur hjá Persónuvernd, segir að stofnuninni hafi borist kvörtun frá einstaklingi sem ósáttur var með þetta fyrirkomulag. Í framhaldinu kallaði Persónuvernd eftir sjónarmiðum Hjálparstarfs kirkjunnar sem hefur svarað erindi stofnunarinnar, að sögn Þórðar. Umfjöllun Persónuverndar um kvörtunina er ólokið.