Segir að atkvæði fólks hafi verið sótt heim

„Ég frétti af því að það væru ákveðnir aðilar að bjóða upp á að fara heim til fólks með kjörseðil og láta það fylla hann út og koma með hann á kjörstað," segir Þorleifur Gunnlaugsson borgarfulltrúi.

Prófkjör VG fyrir borgarstjórnarkosningarnar í vor fór fram um helgina. Þorleifur var í framboði og gaf kost á sér í fyrsta sætið ásamt Sóleyju Tómasdóttur. Þorleifur hafnaði í öðru sæti. Hann segir þó að kæra sín sé ekki tengd niðurstöðum prófkjörsins enda hafi hann lagt hana fram áður en að fyrstu tölur voru birtar á laugardaginn.

Þorleifur vill að utankjörfundaratkvæðagreiðslan verði felld úr gildi, þótt fyrir liggi að hún breyti ekki röð sex efstu frambjóðendanna. Hann segir að um ákveðið réttlætismál sé að ræða sem viðkomi heiðarleika.