Ríkisstjórnin hætti að verja núverandi samkomulag

Forsendan fyrir þverpólitískri sátt um Icesave er að ríkisstjórnin hætti að verja núverandi samkomulag. Þetta segir Birgitt Jónsdóttir, þingmaður Hreyfingarinnar. Hún segist ekki geta sætt sig við að þjóðin borgi vexti af Icesave láninu.

Þverpólitísk sátt um icesave er talin vera forsenda þess að hægt verði að taka upp nýjar viðræður við Breta og Hollendinga um Icesave. Stjórn og stjórnarandstaða funduðu um málið í gær. Forystumenn stjórnarandstöðunnar voru frekar svartsýnir að fundi loknum og sögðu ekkert samkomulag vera í sjónmáli. Össur Skarphéðinsson, utanríkisráðherra, var hins vegar á öðru máli og telur góðar líkur á því að hægt verði að ná samkomulagi milli flokkann.

Birgitta Jónsdóttir, þingmaður Hreyfingarinnar, sagði í Bítinu á Bylgunni í morgun, að forsenda þess að hægt verði að ná þverpólitískri sátt um Icesave er að ríkisstjórnin hætti að verja núverandi samkomulag. „Á sama tíma og verið að tala um samstöðu þá eru þau að verja þennan samning sem þjóðin er að fara að hafna. Þá skil ég ekki hvar við getum náð saman," segir Birgitta.

Birgitta segir ljóst að breyta þurfi samkomulaginu verulega. „Við getum ekki boðið þjóðinni uppá það að mynda þverpólitíska sátt um að breyta bara vöxtunum líttillega vegna þess að það er ekki það sem þjóðin er að fara að kjósa um."

Hún segir að finna þurfi aðra lausn og móta samningsmarkið í samræmi við hana. „Ég get ekki sætt mig við að þjóðin eigi að borga vexti af einhverju láni sem hún samþykkti ekki að taka."