Ekki taka pabba

Sjónvarpsmyndir hafa verið birtar af því þegar fimm ára palestinskur drengur grátbiður Ísraelska hermenn um að handtaka ekki föður sinn.

Ísraelsku hermennirnir komu í þorpið Bakka á Vesturbakkanum og sökuðu bændur þar um að stela vatni frá ísraelsku byggðarlagi. Þeir rifu upp vatnsleiðslur sem voru notaðar til að vökva akra og handtóku nokkra menn.

Þeirra á meðal var faðir Khaleds Jabari sem var skelfingu lostinn þegar hermennirnir voru að færa föður hans á brott.

Hann togaði í föt hermannanna og hrópaði og grét og bað þá um að sleppa pabba sínum. Einn ísraelsku hermannanna tók drenginn í fangið og fór með hann burt meðan faðirinn var settur um borð í herjeppa.

Palestinskur talsmaður barnaverndarsamtaka sagði augljóst að Khaled litli hafi haldið að faðir hans kæmi aldrei aftur. Hann hefði engan skilning á því hvað það væri að handtaka fólk.

Hann sagði að sálfræðingur yrði sendur til Khaleds til þess að vinna með honum úr þessu áfalli.