Henda 185 kílóum á mann

Hver Reykvíkingur henti að meðaltali 185 kílóum af óflokkuðu sorpi á síðasta ári. Það er um fimmtungi minna en árið 2006, þegar hver íbúi henti 233 kílóum að meðaltali.

Í umfjöllun um sorphirðu á vef Reykjavíkurborgar kemur fram að áhugi íbúa á sorpflokkun og breytt neyslumunstur sé líklegasta skýringin á þessari breytingu. Um 2.500 bláar tunnur eru nú í notkun í borginni. Í þær má henda pappír og fernum.

Sorphirða Reykjavíkur sótti tæplega 22 þúsund tonn á síðasta ári, samanborið við rúmlega 25 þúsund tonn árið 2008. - bj